
प्यूठान– प्यूठानको झिमरुक खोलामा पुल निर्माण हुन थालेको पाँच बर्ष बितिसके पनि निर्माण कार्य अलपत्र पर्दा सर्वसाधारण जघाँर तर्न बाध्य रहेका छन् । झिमरुक गाउँपालिका वडा नं. ५, ७ र ८ तथा गौमुखी गाउँपालिकाको लिवाङ्ग जोड्ने ढाडा स्यालीघारी पुलको निर्माण थालेको करिब पाँच बर्ष वितिसकेको हो ।
१८ महिनामा निर्माण सम्पन्न गर्ने गरी निलगिरी आशुँ जेभिले २०७२ सालमा असोजमा निर्माणको जम्मा लिएको थियो । तर निर्माण कम्पनीले बिभिन्न बहाना बनाएर पुल निर्माणको काम रोकेको छ । कम्पनीले समयमै पुल निर्माण नगर्दा स्थानीयले जोखिम मोलेर झिमरुक खोला वारपार गर्न बाध्य भएका छन् ।
पुल समयमै नबन्दा हालसम्म एक दर्जनभन्दा बढी मानिसलाई झिमरुक खोलाले बगाएर ज्यान गुमाएका छन् । पुल निर्माण गर्न सडक पूर्वाधार बिकास कार्यालय रोल्पा र निलगिरी आशुँ जेभिबीच २०७२ साल असोजमा सम्झौता भएको थियो । कार्यालयका अनुसार पुल निर्माणका लागी कम्पनीले चार करोड ५० लाख रुपैंयाँमा ठेक्का पाएको थियो । पुलको लम्वाई एक सय मिटरको रहेको छ ।
सम्झौता अनुसार कम्पनीले २०७३ साल चैत महिनामा सम्पन्न गर्नुपर्ने भएपनि कम्पनीले पिलर राख्ने ठाउँमा ओपन फाउन्डेशन नमिलेको भन्दै रिडिजाइन गर्न माग गरेको थियो । सोहि गत असोजमा निर्माण व्यवसायी, प्रदेश सरकार र सडक पुल कार्यक्रम एलआरबिपीबीच वुटवलमा भएको छलफलपछि पुनः पुल निर्माणको काम सुरु भएको छ । हालसम्म पुलको ५२ प्रतिशत काम सम्पन्न भएको छ ।
प्रकाशित मिति: २० भाद्र २०७७, शनिबार १६:५७