राउटे युवतीमाथि यौन दुर्व्यवहार गर्ने तीन जना पुर्पक्षका लागि कारागार चलान

सुर्खेत – राउटे युवतीमाथि यौन दुर्व्यवहार गरेकाे आराेपमा पक्राउ परेका तीन जनालाई पुर्पक्षका लागि कारागार चलान गरिएको छ । बुधवार उनीहरूलाई पुर्पक्षका लागि कारागार चलन गरिएकाे सुर्खेत जिल्ला अदालतले जनाएकाे छ ।

बुधवार न्यायाधीश डिलप्रकाश सापकोटाको एकल इजलासले दुई जना राउटे युवतीलाई होटलमा लिएर मदिरा खुवाइ यौन दुर्व्यवहार गर्ने गुर्भाकोट नगरपालिका दोमनबहादुर घर्ती, भूपेन्द्र बुढा र होटल सञ्चालक विनोद पुनलाई पुर्पक्षका लागि कारागार चलान गर्न आदेश दिएको हो ।

अदालतका स्रेस्तेदार यमप्रसाद बास्कोटाले बुधवार अदालतले उनीहरूलाई पुर्पक्षका लागि कारागार चलान गर्न आदेश दिएको जानकारी दिनुभयो  ।

यौन दुर्व्यवहार गरेको भिडियो बाहिरिएपछि गएको जेठ २३ गते उनीहरूलाई प्रहरीले पक्राउ गरेको थियो  ।

प्रकाशित मिति: १७ असार २०७८, बिहीबार ०७:१८