कभर खबर

  • ९ आश्विन २०७७, शुक्रबार ०८:०८

दाउन्नेमा खसेको पहिरोमा बस पुरिंदा एकको मृत्यु,१७ जना घाइते,६ जाना गम्भीर

भरतमणि रेग्मी,

 पूर्वी नवलपरासीको बुटवल नारायणगढ सडक खण्ड अन्तरगत दाउन्नेमा खसेको पहिरोमा एउटा बस पुरिंदा बसमा सवार एक जनाको निधन भएको छ । पहिरामा परी १७ जना घाइते भएका छन् । जिल्ला प्रहरी कार्यालय नवलपुरका अनुसार विहीबार साँझ विनयी त्रिवेणी २ विश्वकर्मा बाबा मन्दिर नजिकै माथिबाट खसेको पहिरोमा परी ना ५ ख ७९४० नम्बरको बस पुरिएको थियो ।

पूर्वबाट पश्च्मि जाँदै गरेको उक्त बस पुरिंदा बसमा सवार १८ जना घाइते भएका थिए । घाइते मध्ये पश्चिम रुकुमको आठविसकोठ गाउँपालिका १० बस्ने २५ बर्षको हरिषचन्द केसीको विहीबार राति ९ बजेतिर उपचारको क्रममा पुरानो मेडिकल कलेज चितवनमा निधन भएको जिल्ला प्रहरी कार्यालय नवलपुरका प्रहरी नायव उपरीक्षक मोहनबहादुर खाँणले बताए । दुर्घटनामा परी ११ जना सामान्य घाइते भएको र ६ जनाको अवस्था गम्भीर रहेको छ ।

प्रहरीका अनुसार पहिरोमा पुरिएर सल्यानको श्रीनगर निवासी २७ बर्षीया महिला प्रतिभा खड्का, सोही स्थानका १० बर्षीय प्रज्ञान बस्नेत, १६ बर्षीया खुमा बुढाथोकी, सल्यानको सिमखर्क निवासी ३५ बर्षीय लोकबहादुर बस्नेत, रुकुमको मुसिकोट गाउँपालिका १ निवासी ३० बर्षीय रमेश खड्का र बाफिकोट गाउँपालिका ४ बस्ने २७ बर्षीया शिवा पुन गम्भीर घाइते भएका छन् । उनीहरुको टाउको, ढाड, छातीमा चोट लागेको छ । घाइतेहरुको पुरानो मेडिकल कलेज चितवनमा उपचार भईरहेको छ ।

प्रकाशित मिति: ९ आश्विन २०७७, शुक्रबार ०८:०८