आज राष्ट्र निर्माता पृथ्वी नारायणको जन्मजयन्ती, शारदा नगरपालिकामा सार्वजनीक विदा

सल्यान – आज पुस २७ राष्ट्र निर्माता वडामहारजधिराज पृथ्वीनारायण शाहको २९८ औँ जन्मजयन्ती विभिन्न कार्यक्रम गरेर राष्ट्रिय एकता दिवस मनाइँदैछ । सिंहदरबार पश्चिम मूलद्वारमा नेपाल प्रज्ञा–प्रतिष्ठानद्वारा आयोजना हुने पृथ्वी जयन्ती तथा राष्ट्रिय एकता दिवस समारोहमा राष्ट्र निर्माताको शालीकमा पुष्पहार अर्पण गरी नेपालको एकीकरणमा उनको योगदानको स्मरण गरिने छ ।

विसं १७७९ पुस २७ गते गोर्खामा जन्मिएका पृथ्वीनारायण शाहले ससाना राज्यलाई एकीकरण गरी आधुनिक नेपाल निर्माण गरेका थिए । तत्कालीन नेपालको अवस्थालाई विश्लेषण गर्दै पृथ्वीनारायण शाहबाट भएको दिव्योपदेश अहिले पनि उत्तिकै सान्दर्भिक रहेको भनी दूरदृष्टि व्यक्तिका रुपमा उनको सर्वत्र प्रशंसा हुँदै आएको छ । यसैबीच राष्ट्रिय प्रजातन्त्र पार्टीले राष्ट्रिय एकता दिवसको उपलक्ष्यमा आज दिउँसो चियापान कार्यक्रमको आयोजना गर्दैछ ।

शारदा नगरपालिकामा सार्वजनीक विदा

यता सल्यानको शारदा नगरपालिकाले आज (आईतबार) सार्वजनीक बिदा दिएको छ । पृथ्वी जयन्ती तथा राष्ट्रिय एकता दिवसको अवसरमा नगरपालिकाले बिदा दिएको हो । नगरपालिका भित्रका सवै वडा कार्यालय,बिध्यालय,स्वास्थ्य चौकी लगाएतका नगरपालिका मातहतका सरकारी एवम गैर सरकारी कार्यालय हरुमा बिदा दिने निर्णय गरेको हो ।

प्रकाशित मिति: २७ पुष २०७६, आईतवार ०८:२२