मुसिकोट - रुकुम पश्चिमको सानीभेरी गाउँपालिकामा ट्याक्टरको ठक्करबाटबाट एक बालकको मृत्यु भएको छ । वडा नम्बर २ को गिठाकोटबाट बालुवा लिएर सिम्ली तर्फ आइरहेको रा १ त ४८७१ नम्बरको ट्याक्टरले वडा नम्बर ७ को सहरेमा स्थानीय ५ वर्षीय बालक रियान बुढाथोकीलाई ठक्कर दिँदा मृत्यु भएको हो ।
रियानको उपचारका क्रममा सानीभेरी गाउँपालिका अस्पताल छोटेबगरमा मृत्यु भएको जिल्ला प्रहरी कार्यालयका सूचना अधिकारी प्रहरी निरीक्षक झबिन्द परियारले जानकारी दिए । उक्त ट्याक्टर सह चालक सानीभेरी ७ का नवराज पुन मगरले चलाएको र चालकलाई नियन्त्रणमा लिइएको उनको भनाई छ ।
शव गाउँपालिका अस्पतालमै रहेको र घटनाको थप अनुसन्धान चलिरहेको प्रहरी निरीक्षक परियारले बताए ।
९ बैशाख २०८३, बिहिबार ०७:३७ मा प्रकाशित
